דער רוביק'ס קיוב

פידל · נעכטן 6:31 PM

די CFOP מעטאדע

אריינפיר:

ווי געזאגט פריער זענען פארהאן אפאר מעטאדן צו לייזן דעם רוביק'ס קיוב סיסטעמאטיש. די פשוטע בעגינערס מעטאד קען מען אראפלאדענען פון די אפיציעלע רוביק'ס וועבייטל (לינק ביים ענדע פונעם פריערדיגן ארטיקל) עס לייגט אויס וויאזוי צו לייזן דעם קיוב מיט קלארע וויזואלן. אין דעם ארטיקל גייט מען זיך נעמען צום CFOP מעטאד און עס אראפלייגן באריכות טריט ביי טריט אז איר זאלט עס קענען לערנען און עס נוצן צו לייזן אייער אייגענע קיוב.

די מעלה פון דעם מעטאד איז אז עס קען ווערן געלערנט אויף מער א פשוטע אופן מיט ווייניגער אלגאריטמס צו געדענקען, אבער צום זעלבן צייט קען מען אייביג ווייטער וואקסן מיט דעם און זיך צולערנען נאך אלגאריטמס וואס מאכט די מעטאד נאך מער עפישענט און שנעלער. די מעטאד ווערט באנוצט דורך רוב סוקסעספולע פארמעסט שפילער, עס איז זייער צענטראל און פאפולאר אבער אויך צוגענגליך פאר ניי-קומערס. אלע שטאפלען אויפן הויכן לעוועל פארמאגן 120 אלגאריטמס אינאיינעם, אבער אויף אנצוהייבן קען מען לערנען אן ערך פון בלויז 15 און עס איז גענוג ווילאנג מען איז נישט אויסן עס צו לייזן שנעלער.

די פיר שטאפלען פון CFOP:

C שטייט פאר Cross. דאס איז די ערשטע שטאפל פון אויסשטעלן די ווייסע זייט אלס א קראס, די צענטער מיט די עקן אינעם ריכטיגן פלאץ, נאכנישט די ווינקלען.

F שטייט פאר First 2 layers אדער F2L אין קורצן. דאס איז די שטאפל וואו מען לייזט די ווייסע ווינקלען אינאיינעם מיט די עקן איבער זיי - די רויטע, בלויע, גרינע און אראנדזשע.

O שטייט פאר Orienting last layer אדער OLL. דאס איז ווען מען איז מסדר אלע געלע פון אויבן, אין דעם שטאפל זענען זיי נאכנישט אין די ריכטיגע פלאץ.

P שטייט פאר Permuting last layer אדער PLL. דאס איז ווען מען שטעלט אויס אלע געלע אין זייער ריכטיגן פלאץ.

OLL און PLL האבן צוויי וועגן זיי צו לייזן, look 1 און 2 look.
איין בליק באדייט אז יעדע קאנפיגעראציע האט א באזונדערע אלגאריטם און מען לייזט עס אויף איינמאל, OLL האט 57 אלגאריטמס אין דעם מהלך, און PLL האט 21 לאנגע אלגאריטמס.
2 look איז אבער וואס מיר וועלן לערנען דא און דאס לייזט קודם די ווינקלען אין OLL און דאן די עקן, ביי PLL לייזט עס ערשט די עקן און דאן די ווינקלען, אבער עס ברענגט אראפ די נומער פון אלגאריטמס צו בערך 6 פאר OLL און PLL באזונדער.

Cross:

די ערשטע שטאפל פארלאנגט נישט בדוקא קיין סופיסטיקירטע אלגאריטמס עס איז זייער אינטואטיוו און עס איז שווער צו צומישן די געלייזטע שטיקלעך אין דעם שטאפל אז אן אלגאריטם זאל זיך אפילו אויספעלן. מען דארף זען אז די ווייסע עקן זאלן אנקומען אונטן אין זייער ריכטיגן פלאץ, דאס מיינט די ווייס-בלויע עק זאל אנכאפן סיי די ווייסע און סיי די בלויע צענטער, און אזוי מיט די אלע אנדערע קאלירן. כזה:

א גרינגע וועג דאס צו ערייכן איז ווען א ווייסע ליגט מיט ווייסן פנים אויפן געלן זייט – אויבן פונעם קיוב, דרייט מען די געלע זייט – U ביז די זייטיגע קאליר פון יענעם עק טרעפט זיך מיט זיין צענטער, לדוגמא א ווייס בלויע עק רירט אן דעם בלויע צענטער, מען דרייט דאן אראפ די בלויע זייט 180 דעגרי. און עס איז אין פלאץ!

אויב די ווייסע זייט ליגט אויסגעדרייט צו איינע פון די זייטן קען מען אייביג עס ארויפדרייען צו אויבן אדער צו אונטן מאכענדיג זיכער אז די ווייסע זייט קומט אן אויבן/אונטן, לדוגמא אויב די ווייסע זייט ליגט אויפן גרינעם זייט, די זייט צום מענטש – F, רעכטס אדער לינקס, דרייט מען נישט די גרינע זייט נאר מען דרייט די ספעציפישע זייט אזוי אז די ווייסע זייט קומט אן אויבן אדער אונטן געוואנדן צו מען איז גרייט עס צו שטעלן אין פלאץ.

איך האף עס איז קלאר. צופיל מסביר זיין דעם שטאפל קען נאר מער צומישן. פראבירט אליין אויס, נאך אפאר פראוון דארפט איר צו זיין סוקסעספול און אראפברענגען אלע ווייסע עקן אין פלאץ.

F2L:

אין דעם שטאפל זוכן מיר צו לייזן די ווייסע ווינקלען אינאיינעם מיט די עקן איבער זיי, וואס מיט דעם זענען די אונטערשטע צוויי שיכטן געלייזט.

עס זענען פארהאן איבער 70 מעגליכע קאנפיגעראציעס איידער מען הייבט אן דעם שטאפל, אבער גייענדיג מיט יעדע ווינקל באזונדער קען מען איינטיילן דעם שטאפל אין 5 באזונדערע מעגליכקייטן, און מיט געציילטע אלגאריטמס קען מען לייזן ווינקל ביי ווינקל אן צומישן די פריערדיגע.

פאלגענד זענען די 5 מעגליכע קאנפיגעראציעס וואס מען גייט לייזן. פארשטייט זיך די קאלירן זענען דא להמחשה בעלמא, סיי וועלכע קאלירן האבן די זעלבע כללים:

די געדאנק איז אז די ווינקל מיט די עק וואס באלאנגען צוזאמען זענען ביידע אויפן אויבערשטן שיכט אבער זיי רירן זיך דערווייל נישט אן. די ווינקל קען ליגן אויף דריי וועגן, סיי וועלכע פון זיינע דריי קאלירן קענען זיין מיטן פנים ארויף, און די עק קען ליגן אויף צוויי וועגן, פינף אינאיינעם.

אנגרייטן די שטיקלעך פאר F2L.

די ערשטע זאך איז וויכטיג צו קענען אויסשטעלן דעם קיוב צו איינע פון די 5 פעלער. אפט מאל כאפן זיי זיך יא אן אויפן נישט ריכטיגן וועג, אדער זענען זיי באהאלטן פון אונטן אדער צו איינע פון די זייטן און מען דארף זיי ערשט ארויפברענגען איידער מען הייבט זיי אן צו לייזן.

אויב די ווינקל וואס איר זוכט איז אין א ווינקל פון אונטן, האלט דעם ווינקל צו אייער רעכטע זייט און איר קענט אייביג מאכן 'R U R’ U (רעכטע clockwise, אויבערשטע clockwise, רעכטע counterclockwise, און אויבערשטע counterclockwise), און עס קומט אן צום אויבערשטן רעכטן ווינקל אן צומישן סיי וועלכע אנדערע געלייזטע שטיקלעך.

די זעלבע איז ווען די עק וואס איר זוכט איז אויף א זייט, דרייט ארום דעם קיוב אז יענע זייט איז אויף אייער רעכטע זייט און מאכט די 'R U R’ U אלגאריטם און עס וועט זיך טרעפן אויבן. מאכט נאר זיכער אז די ווינקל וואס ליגט שוין אויבן זאל נישט ווערן באהאלטן אלס רעזולטאט, איר קענט דאס טון דורכן אוועקדרייען U איידער איר מאכט דעם אלגאריטם.

ווען ביידע ליגן שוין אויבן מאכט זיכער אז זיי רירן זיך נישט אן, אויב רירן זיי זיך יא אן נוצט דעם 'באהאלטן אלגאריטם' וואס איז אז איר האלט דעם ווינקל צו די רעכטע אויבערשטע זייט, די עק זאל זיין אין די מיטעלסטע שורה, און איר מאכט R’ U R. אויב די עק ליגט אויך אויף די רעכטע זייט פון אויבן מאכט 'U’ R U’ R. עס איז נישט קיין חילוק וועלכע זייט די עק טרעפט זיך ווילאנג עס כאפט נישט אן דעם ווינקל.

יעצט ווען איר האט איינע פון די אויבדערמאנטע 5 פעלער קענט איר זיי אנהייבן צו לייזן. און דא וועט זיך ווענדן וועלכע פאל איר האט.

F2L - די 5 פעלער.

מעטשינג. ווען די עק וואס איר האט איז מיטן פנים ארויף צו א געוויסע קאליר, און די ווינקל איז אויך מיטן פנים ארויף צום זעלבן קאליר, און די ווייסע זייט איז אויפן רעכטן זייט (די בילד מערסט צו לינקס אויבן). דרייט U אז די ווינקל זאל זיך טרעפן העכער די פלאץ ווי עס דארף עווענטואל אריינגיין און האלטס דעם קיוב אז יענע ווינקל זאל זיין רעכטס-פארנט פון אייך.
איר גייט יעצט לייגן דעם ווינקל אינעם 'באהאלטן ארט' - 'R, און איר גייט דרייען U וועלכע וועג עס גייט ברענגען דעם עק צו די פארנט-מיטן פון אייך. דאן ווען איר מאכט R האט איר זיי אין די ריכטיגע אויסשטעל גרייט אריינצוגיין אינעם ווינקל צוזאמען. עס אריינצושטעלן גייט איר מאכן U’ F’ U F און איר האט איין ווינקל מסודר.
אויב האט איר נאך מעטשינג פעלער, מאכט דעם זעלבן שפיל דארטן.
נישט מעטשינג. ווען די עק מיטן ווינקל האבן אנדערע קאלירן אויף ארויף, ווייס איז נאכאלץ רעכטס (צווייטע בילד פון לינקס).
מאכט זיכער אז די עק איז צו די בעק, איר קענט דאס טון דורכן לייגן די ווינקל אינעם באהאלטן ארט און דרייען U, אנדערש ווי פריער וואס זיין פאזיציע מאכט נישט אויס לינקס אדער בעק.
דרייט 'R U R, און די ווינקל איז מסודר.
ווען די ווינקל האט די ווייסע פנים אויף ארויף (מיטעלסטע בילד).
דרייט U ביז די עק כאפט אן איר צענטער קאליר און ברענגט דעם קיוב אז יענע זייט זאל זיין צו אייער פארנט, אפילו דאס שטופט אוועק דעם ווינקל פון רעכטס-פארנט.
דרייט F אוועק פון די ריכטיגע זייט, דאס מיינט אויב איז די עק אראנדזש בלוי און איר האלט אראנדזש אין פארנט דרייט עס counterclockwise אזוי אז די בלוי גייט נישט צום ריכטיגן זייט.
ברענגט דעם ווינקל איבער דעם עק דורכן דרייען U סיי וועלכע וועג, יעצט זענען די צוויי באהאפטן.
דרייט צוריק F אז די סעט איז יעצט פון אויבן צוריק.
דרייט U’ F’ U F, און עס איז אריין אין פלאץ. מעגליך איר דארפט מאכן די שפיגל מאוו אויב די ווייס שטייט אין פארנט.
שפיגל מעטשינג, ווען די קאלירן פון אויבן זענען די זעלבע אבער ווייס איז פון פארנט נישט רעכטס (צווייטע בילד רעכטס).
דרייט 'U, באהאלט די ווינקל צו די בעק-רעכטס דורך R, דרייט U ביז די עק איז צו די בעק, ברענגט ארויף דעם ווינקל – 'R.
דרייט 'U2 R U’ R און עס איז אין פלאץ.
נישט מעטשינג מיט ווייס אין פארנט (ערשטע בילד רעכטס).
מאכט זיכער די עק איז אויפן לינקע זייט, באהאלט דעם ווינקל און דרייט U אויב נישט.
דרייט F’ U’ F און עס איז אין פלאץ.

נעמט אין אכט:

פאר די ערשטע צוויי אדער דריי ווינקלען וואס איז לייזט וועט עס נארמאלערהייט נישט צומישן די אנדערע וואס איר האט שוין געלייזט. אבער ווען איר האלט ביין פערטן, איר האלט דעם ווינקל איבער די פלאץ וואו עס באלאנגט, און איר ווילט למשל עס באהאלטן פאר א מינוט אוועקצוריקן דעם עק, אדער איר ווילט עס לייזן אין געוויסע פון די פעלער, וועט אויסקומען אז איר ברענגט ארויף א געלייזטע ווינקל און איר צומישט עס.
אין דעם פאל קענט איר אויפגעבן אויפן כלל פון עס האלטן איבער די באלאנגעטע ווינקל. דרייט U אז ווען איר באהאלט דעם ווינקל זאל נאר קומען צום אויבערפלאך די אומגעלייזטע זייט.
שפילט זיך ארום דערמיט, איר וועט איינזען אז דאס איז זייער אינטואטיוו און עס העלפט לייזן אלע ווינקלען אן צומישן איינער דעם אנדערן.

אינעם קומענדיגן ארטיקל:
OLL און PLL שטאפלען.

אויב זענט איר באהאוונט אין די בעגינערס מעטאד קענט איר אין דעם צייט לייזן די אויבערשטע שיכט מיט יענעם מעטאד, עס וועט ארבייטן!

פידל · נעכטן 6:55 PM

OLL און PLL שטאפלען פון CFOP

נאכן לייזן די אונטערשטע צוויי שיכטן דורכן מאכן דעם ווייסע קראס און דאן דעם F2L שטאפל, קומט די צייט צו מסדר זיין די געלע זייט פון אויבן און זיי שטעלן אין פלאץ. דערפאר איז דא OLL וועלכע שטעלט זיי אלע פון אויבן, און PLL וועלכע שטעלט זיי אין די ריכטיגע פלאץ.

די פראפעסיאנאלע מהלך האט 57 אלגאריטמס פאר OLL, און 21 פאר PLL. מיר גייען אבער איינטיילן ביידע שטאפלען אין 2, אדער ווי עס ווערט גערופן 2 Look OLL/PLL. מיט דעם מהלך ברענגט עס אראפ די צאל אלגאריטמס צו 10 פאר OLL און צו 6 פאר PLL.

OLL:

צו מסדר זיין דעם געלע שיכט הייבן מיר אן מיטן אהערשטעלן א קראס מיט די עקן און דאן מסדר זיין די ווינקלען. ביידע פון די דארפן דערווייל נישט זיין אויפן ריכטיגן פלאץ, די עיקר איז אז זיי זענען געל.

נאכן לייזן די אונטערשטע צוויי שיכטן זענען דא 3 מעגליכקייטן וויאזוי די געלע זייט קוקט אויס, עס קען האבן אדער נאר די צענטער, אדער א פארעם פון א L, אדער א שורה פון געל, כזה:

פאר דערווייל איגנארירט מען די ווינקלען אינגאנצן, עס מאכט נישט אויס וואו זיי זענען.

אויב עס איז א שורה ווי אין די לינקע בילד מאכט מען דעם פאלגענדן אלגאריטם:
'F (R U R’ U’) F
עס איז זייער גרינג, עס האט די אויבענדערמאנטע R U R’ U’ מאווס נאר מען דרייט די פארנט פארדעם און נאכדעם.
אויב איז עס די L פארעם, דרייט מען אז די L זאל זיין אויפן רעכט-פארנט זייט, ווי אין די מיטעלסטע בילד, און מען מאכט אן אלגאריטם כמעט ווי פריער נאר די פארנט דרייט מען אינאיינעם מיט די מיטעלסטע שיכט:
'f (R U R’ U’) f
געדענקט אז lowercase מיינט אז מען דרייט צוויי שיכטן אינאיינעם.
ווען עס האט נאר די צענטער מאכט מען ביידע אלגאריטמס אינאיינעם:
'F (R U R’ U’) F' f (R U R’ U’) f

איינמאל די קראס איז מסודר זענען דא 7 אופנים וויאזוי די געלע זייט קען זיין אויסגעשטעלט, זיי רופן זיך, Sune, Anti-Sune, H, Pi, U, T, און L. כזה:

Sune איז ווען איין ווינקל איז מסודר און ווען מען האלט עס אויפן לינקן-פארנט זייט איז דא א געלע אויף די פאדערשטע זייט. די אלגאריטם גייט:
'R U R' U R U2 R
Anti-Sune איז די שפיגל פון די פריערדיגע, נאר אים דעם פאל דרייט מען U אז די גוטע ווינקל זאל זיין לינקס-בעק אויף די אויבערשטע זייט, און מען מאכט:
(R’ U’ R U’) R’ U2 R
H איז ווען קיין איין ווינקל איז נישט אויף די אויבערשטע זייט נאר זיי זענען ווי העדלייטס אויף ביידע זייטן. מען האלט זיי אז די העדלייטס זאלן זיין צו רעכטס און צו לינקס, און מען מאכט:
R’ U’ R U’ (R’ U R U’) R’ U2 R
Pi איז ווען פון איין זייט איז דא העדלייטס און פון די אנדערע זייט זענען זיי ווי אויגן פון א פייגל, אנקעגן איינער די צווייטע. מען האלט די העדלייטס אויף די לינקע זייט און מען מאכט:
R U2 R2 U’ R2 U’ R2 U2 R
U איז ווען צוויי ווינקלען זענען מסודר אויפן זעלבן זייט און פון די אנדערע זייט זענען דא העדלייטס, מען האלט די העדלייטס פון פארענט צו זיך:
'R2 D R’ U2 R D’ R’ U2 R
T איז ווען צוויי ווינקלען זענען מסודר אויפן זעלבן זייט און פון די אנדערע זייט זענען דא פייגל אויגן, די מסודר'דיגע לייגט מען אויפן רעכטן זייט:
'r U R’ U’ r’ F R F
געדענקט אז lowercase מיינט אז מען דרייט צוויי שיכטן אינאיינעם.
L איז ווען צוויי שיפע ווינקלען זענען מסודר, מען האלט איין ווינקל רעכטס-פארנט און די צווייטע לינקס-בעק:
'F R’ F’ r U R U’ r

PLL:

איינמאל אלע געלע זענען פון אויבן קען מען זיך נעמען אויסשטעלן יעדער אין זיין פלאץ. אין דעם שטאפל טיילט מען עס אויך איין אין 2 Look, קודם שטעלט מען אויס די ווינקלען גוט, און דאן די עקן, וואס האבן צוזאמען 6 אלגאריטמס.

די ווינקלען קענען אויסזען ווי פאלגענד:

די לינקע בילד האט ווי העדלייטס אויף די לינקע זייט, די קאליר וואס האט די העדלייטס מאכט נישט אויס, מען דארף עס נאר לייגן אויף די לינקע זייט:
'R U R’ U’ R’ F R2 U’ R’ U’ R U R’ F
די רעכטע בילד דארף מען טוישן די שיפע ווינקלען, מען האלט עס ווי אויפן בילד, די גוטע ווינקלען אויף לינקס-פארנט און רעכטס-בעק:
'F R U’ R’ U’ R U R’ F’ R U R’ U’ R’ F R F

ווען די ווינקלען זענען מסודר האט מען 4 מעגליכקייטן וויאזוי צו רוקן די עקן, ווי פאלגענד:

די קאלירן אויפן בילד מאכן נישט אויס, לייגט נאר צו קאפ צו די פאזיציעס און וואו מען וויל זיי רוקן.

אויפן רעכטן בילד האט מען איין גוטע עק אין די בעק, מען וויל טוישן ווי א דרייעק counterclockwise:
R U’ R U R U R U’ R’ U’ R2
צווייט פון רעכטס וויל מען רוקן א דרייעק clockwise:
'R2 U R U R’ U’ R’ U’ R’ U R
דריטע פון רעכטס וויל מען טוישן אלע עקן מיט די אנקעגן זיי:
M’ U’ M2 U’ M2 U’ M’ U2 M2
געדענקט אז M רעכנט מען clockwise אזויווי L - די לינקע זייט
די אויפן לינקן זייט וויל מען טוישן די עקן מיט די שיפע פאזיציעס:
M2 U’ M2 U2 M2 U’ M2

און דערמיט האבן מיר געלייזט דעם רוביקס קיוב דורכן נוצן די CFOP מעטאד!

אויספיר.

אויבן אויף קוקט F2L אפשר אויס מער קאמפליצירט ווי OLL און PLL, אבער דאס איז נאר ווייל עס האט מער כללים וויאזוי צו האלטן דעם קיוב איידער מען הייבט אן די אלגאריטמס. די אלגאריטמס אליין ווי אויך די פאזיציע איינמאל מען כאפט עס, איז אין ווארהייט מער אינטואטיוו. די לעצטע צוויי שטאפלען דארף מען קענען געדענקען די אלע לענגערע אלגאריטמס, און נאך מער, אויב וויל מען זיין מער פראפעסיאנאל, וואס מאכט עס שווערער.

חזר'ט אייך איין די אויבנדערמאנטע אלגאריטמס, עס נעמט נישט לאנג, און די הנאה פון זען די קיוב געלייזט איז אויך נישט אוועקצומאכן. דערווייל לאז איך עס ביי דעם, אויב וועט זיין א פארלאנג וועט מען צוברענגען די אלגאריטמס פאר די מער עדווענסד 1 look OLL און PLL.

פידל · נעכטן 7:00 PM

לאזט איבער קאמענטס צו איר ווילט מען זאל מאריך זיין אין געוויסע פרטים וואס ווערן אפשר נישט גענוג קלאר אראפגעלייגט.

שעפטאל · נעכטן 11:44 PM

קודם א לייק און א שכוח!

דער רוביק'ס קיוב