שטודירנדיג און ליינענדיג איבער די צווייטע וועלט מלחמה, האט מען זיך אייביג געמוטשטעט צו פארשטיין, וויאזוי האט היטלער ימש"ו געקענט אזוי איבערדרייען א לאנד פון בעסערע מענטשן צו אזעלכע חיות מטורפים, רוצחים, אנסים, ... כ'מיין ס'נישטא קיין ווערטער ארויסצוברענגען די נאציזם און די נאציס ימש"ו.
וויאזוי?
מ'האט אייביג געזאגט דער באשעפער האט עם געגעבן א כח צו איינעמען מענטשן, כאריזמע, און מיט דעם האט ער פארדרייט זייער קאפ. אבער ס'איז געווען א זאך וואס מ'האט קיינמאל נישט פארשטאנען, און קיינמאל נישט ארויסגעהאט.
היינט ווען מ'לעבט מיט די צודרייטע עפאכע פון דאנעלד טראמפ, קען מען עס אנהייבן צו פארשטיין, ווען מיליאנען מענטשן זענען זיכער אז די אימיגראנטן נעמען צו זייערע דזשאבס, כאטש וואס רובא דרובא עקאנאמיסטן שרייען אז ס'איז נישט אמת. מיליאנען מענטשן זענען זיכער אז אלע צו רוב אימיגראנטן זענען קרימינאלן און רוצחים, כאטשיג וואס די מציאות ווייזט אינגאנצן אן אנדערן בילד. ווען מיליאנען מענטשן זענען גרייט צו שווערן אז אימיגראנטן אין ספרינגפילד עסן קעץ און הונט פון איינוואוינער, כאטשיג וואס אלע לאו אינפארסמענט איינגעשטעלטע (צווישן זיי רעפובליקאנער) האבן קלאר געשטעלט אז לא היו דברים מעולם! וכן הלאה, וכן הלאה. זענען מיר זוכה צו לעבן אין א צייט ווי א צודרייטער פארשוין האט א כאריזמע, און נארמאלע געזונטע מענטשן פאלן פאר זיינע שקרים אויף א צודרייטן אופן.
און פופציג יאר ארום וועלן אונזערע אייניקלעך אונז פרעגן, זיידי וויאזוי איז געווען מעגליך צו פאלן פאר אזא נידריגן נארישן צודרייטן פארשוין??? וואס גייען אונז עם ענטפערן? וואס גייסטו עם ענטפערן? דו וואס דו שטיצט יעצט טראמפ? איך אליין בין אויך געפאלן פאר דעם דעמאגאג, כ'ווייס נישט וויאזוי, זעהט אויס דער באשעפער האט עם געגעבן א כח. און דיין אייניקל וועט זיך נישט גלייבן זיינע אויערן, וואס?! דו זיידי?! ביזסט דאך אזא קלוגער מענטש, וויאזוי האסטו געקענט פאלן פאר אזא נארישן בריה? וואס גייסטו עם ענטפערן?!
ס'ווערד צו אנצייכענען אז כ'האלט בהדיא נישט אז טראמפ איז ווי היטלער, חס ושלום (כאטשיג טראמפ איז א ודאי נישט קיין טלית שכולה תכלת), כ'רעד דא אלס די חלק פון די פאלן פאר זיין דעמאגאגיע.
ס'כדאי צו וואטשן טראמפ'ס אויפטריטן מיט אביסל א דרויסנדיגערער בליק, אביסל א ניכטערער בליק, מענטשן לאכן און שרייען און פארפירן פאר די נארישסטע ווערטער וואס פאלן ארויס פון די לאך וואס רופט זיך מויל, ממש, אזעלכע נארישע ווערטער ווי "די פארמערס אין אייאווע האבן מיר ליב", כ'מיין וואס איז דאס? א סטעיטמענט? א הבטחה? א רוח הקודש? און דער עולם אפלאדירט און פרייט זיך און שעפט נחת פון די צודרייטע קלוגשאפט פון זייער אפגאט, מ'קען מיינען ער זאגט אזעלכע קלוגע ווערטער, כאטש האלב אזוי קלוג ווי איינשטיין. באמת, וואס זאגט ער?
